A aprobación ambiental do proxecto eólico Mouriños pon en dúbida a utilidade da normativa sobre a protección da natureza en Galicia
O documento publicado pola Dirección Xeral de Medio Ambiente e Cambio Climático non garante a integridade e pervivencia dos valores naturais da Serra do Gontón, unha das últimas paisaxes virxes da Costa da Morte.
Penedo do Medio, en el corazón de la Serra do Gontón |
Salvemos Cabana lamenta profundamente que a Xunta recurrise a publicar a Declaración de Impacto Ambiental (DIA) do proxecto eólico Mouriños en metade do mes de agosto supoñendo que así vai atopar unha menor oposición social fronte a un proxecto que só aposta polo beneficio empresarial pero que supón unha carga inasumible para o futuro da Comarca de Bergantiños.
Lonxe diso, esta situación non fai máis que reavivar a protesta social fronte ao que está a suceder en Galicia con este este e outros proxectos similares de Naturgy coma o Pena Forcada-Catasol II, o que acaba poñendo en dúbida se a normativa sobre a protección da natureza en algunha utilidade en territorio galego.
O documento publicado pola Dirección Xeral de Medio Ambiente e Cambio Climático ignora por sistema a maioría das alegacións presentadas tanto por entidades como por decenas de particulares e só atende á eliminación dun dos aeroxeradores (o M1), algo sen dúbida posible grazas á información achegada ao Instituto de Estudos do Territorio (IET) sobre a vulnerabilidade da paisaxe que rodea ao coñecido como Pico de Sinde, no extremo norte da serra costeira.
FALTA DE GARANTÍAS NA PROTECCIÓN DUNHA ESPECIE EN PERIGO DE EXTINCIÓN
En canto á protección da biodiversidade, tanto a contorna poligonal como as infraestruturas do proxecto eólico atópanse dentro da área de distribución da subespecie lusitánica da escribenta das canaveiras (Emberiza schoeniclus L subsp.lusitanica Steinbacher), en perigo de extinción. Resulta lamentable que a Xunta dea por boas as afirmacións da empresa de que na área de implantación "non se atopan humidais ou hábitats apropiados para o desenvolvimento desta especie" cando debido á súa proximidade aos mesmos, a zona pode ser utilizada como corredor ecolóxico entre eles.
AFECCIÓN A AVES E QUIRÓPTEROS
Doutra banda, non se entende como a Dirección Xeral de Medio Ambiente e Cambio Climático pode dar luz verde a un proxecto cuxa empresa promotora indica que "resulta previsible un efecto acumulativo e sinérxico por colisión e efectos barreira sobre a avifauna e quirópteros", máis cando xa manifestara no seu Estudo de Impacto Ambiental (EIA) que o elevado custo xustificaba a non instalación nos aeroxeradores de dispositivos automáticos que posibiliten o paro de emerxencia por colisión como radares ou sistemas de tipo DTBird. E todo, a escasa distancia dunha Important Bird Area (IBA) e nas inmediacións da Zona de Especial Protección para as Aves ( ZEPA) Costa da Morte Norte (ES0000176) e a ZEPA correspondente ao espazo mariño Costa da Morte (ES0000497) onde se estima, segundo os datos do Ministerio de Medio Ambiente, que máis dun millón de aves migratorias pasan durante o verán-outono durante a súa migración anual.
ACONDICIONAMENTO DO MIRADOIRO DA FERNANDIÑA Á BEIRA DUN AEROXERADOR CON ALTOS NIVEIS DE EMISIÓN SONORA
Como de "ciencia ficción" pode cualificarse o obxectivo que figura na Declaración de Impacto Ambiental aprobada pola Xunta do acondicionamento do miradoiro da Fernandiña a escasa distancia do aeroxerador M2, máis cando a promotora recoñeceu na documentación presenta a consultas durante o proceso de tramitación que "o nivel de potencia sonora dos aeroxeradores é aproximadamente de 110 decibeis", un nivel comparable ao da música dunha discoteca a todo volume. De feito, a partir dos 120 decibeis, o ouvido humano entra no limiar da dor e hai risco de xordeira. Hai que lembrar que aínda que a percepción diminúe coa distancia a proximidade entre o miradoiro da Fernandiña e o aeroxerador M2 imposibilitará unha observación tranquila da paisaxe cando este se atope en funcionamento.
VERGOÑENTA UTILIZACIÓN DA AXENCIA DE TURISMO DE GALICIA
Finalmente, hai que destacar a pretensión que figura no texto de realizar unha campaña de divulgación "de todos os valores naturais, culturais e patrimoniais da zona, así como as rutas turísticas, de senderismo e praias" a realizar "durante o primeiro ano de explotación do parque eólico" que se poderá levar a cabo "a través de vídeos promocionais, charlas, visitas guiadas, etc." e que "deberá mostrar tamén os beneficios da enerxía eólica", unha campaña que se realizará "en coordinación coa Axencia de Turismo de Galicia".
Neste punto resulta inaceptable que unha vez autorizada a desfiguración permanente dos montes da Serra do Gontón, a Xunta poida permitir a utilización dunha axencia pública, con recursos financiados pola cidadanía, para a realización dunha campaña de marketing a favor dos intereses particulares dunha corporación cuxo fin último é o beneficio empresarial e o engrosamento das contas de resultados dos seus accionistas.
(15.8.2018)