A Xunta de Galicia debe restaurar de maneira subsidiaria os cursos fluviais afectados polos antigos labores mineiros de Touro
A Asociación Salvemos Cabana, que puntualmente presentou alegacións, felicítase pola decisión da Xunta de non autorizar o proxecto de reapertura da mina de cobre de Touro, pero lembra que a situación actual dos cursos fluviais da zona é incompatible coa actual lexislación europea en materia de protección de augas e que un Goberno responsable ten que velar, ante todo, pola protección da saúde humana e o medio ambiente.
Contaminación mineira no río Portapego ao seu paso pola localidade de Touro |
Salvemos Cabana remitiu xa este caso á
Oficina do Defensor del Pueblo no ano 2013 polas súas similitudes co
proxecto aurífero a ceo aberto Corcoesto dado que a mina de Touro, de
máis de 600 hectáreas de extensión, foi explotada no período 1974-1988
para a extracción de cobre, aínda que tamén se obtiveron pequenas
cantidades de ouro a partir do concentrado.
Dito
proxecto foi operado a ceo aberto sen ningún tipo de restauración
posterior e logo do seu abandono nos anos 80 non existiu un control
significativo por parte das autoridades da Xunta de Galicia, o que
derivou na oxidación dos sulfuros metálicos presentes no mineral en
contacto cos elementos e a extrema acidificación das augas de drenaxe,
xerando un problema de salubridade ambiental e un risco evidente para as
poboacións limítrofes.
Tras unha investigación
desenvolvida en profundidade polo Alto Comisionado, o Defensor del
Pueblo incluíu á Consellería de Economía e Industria, e polo tanto ao
actual Executivo da Xunta de Galicia, dentro das administracións "non
colaboradoras ou entorpecedoras", tal como figura no Anexo D do seu
informe do ano 2017, o que na práctica demostrou o pouco interese do
Goberno galego en poñer unha solución efectiva ao problema.
A SITUACIÓN ACTUAL EN TOURO NON É COMPATIBLE COA PROTECCIÓN DA SAÚDE HUMANA E OS ECOSISTEMAS
A
cancelación do proxecto de reapertura da mina de cobre de Touro debe
servir de punto de partida para que a Xunta de Galicia deixe de eludir
dunha vez por todas os problemas de seguridade e restauración provocados
pola actividade mineira en Touro e dea cumprimento á normativa que a
nivel europeo aposta pola protección dos recursos hídricos e os
ecosistemas asociados.
Así, a Directiva 2000/60/CE, do
Parlamento Europeo e o Consello, pola que se establece un marco
comunitario de actuación no ámbito de política de augas busca previr
"todo deterioración adicional" protexendo e mellorando o estado dos
ecosistemas acuáticos, tomando cantas medidas sexan pertinentes para
garantir a redución progresiva da contaminación evitanto novos casos en
augas superficiais ou subterráneas.
Tendo en cuenta
estas consideracións, o Executivo galego ten agora a oportunidade de
demostrar en Touro a súa aposta polo interese común exercendo unha
responsabilidade institucional que aínda que chega con moito atraso o
fai no momento preciso para dar un cambio de rumbo á súa política
mineira, que estes últimos anos uniu na súa contra a colectivos, persoas
e entidades de toda Galicia.
(29.1.2020)