A instalación do parque eólico mariño Breogán é incompatible coa protección do principal corredor migratorio de avifauna de Europa

A documentación do proxecto, que se atopa en fase inicial de información pública ata o próximo 1 de xuño, demostra que a Zona de Especial Protección para as aves (ZEPA) Espazo mariño de Punta de Candelaria-Ría de Ortigueira-Estaca de Bares verase especialmente afectada polo desenvolvemento do proxecto offshore de Capital Energy debido á súa proximidade á zona de implantación e podería supoñer un obstáculo insalvable para as aves mariñas, que cada ano pasan en números que superan o millón de exemplares durante a súa migración postnupcial entre os meses de agosto e novembro, o que converte á área nunha referencia a nivel continental.

Máis da metade da poboación mundial do mascato (Morus bassanus) pasa polo corredor migratorio afectado polo parque eólico mariño Breogán durante a súa migración anual.

Entre outras moitas especies, esta ZEPA alberga 17 taxóns clave de conservación prioritaria, aves cuxa supervivencia resulta fundamental debido aos seus valores poboacionais, status de ameaza ou representatividade e que xustifican a súa importancia ornitolóxica a nivel nacional e internacional.

Así, o mourelo común (Melanitta nigra), a pardela cincenta atlántica (Calonectris diomedea borealis), a pardela escura (Puffinus griseus), a furabuchos atlántico (Puffinus puffinus), o furabuchos balear (Puffinus mauretanicus), o mascato común (Morus bassanus), o corvo mariño cristado (Phalacrocorax aristotelis aristotelis), a palleira pomarina (Stercorarius pomarinus), a palleira rabilonga (Stercorarius longicaudus), a palleira parasita (Stercorarius parasiticus), a palleira grande (Stercorarius skua), a gaivota de cabeza negra (Larus melanocephalus) e a gaivota de Sabine (Larus sabini), gaivota escura (Larus fuscos), o carrán cristado (Sterna sandvicensis), o carrán común (Sterna hirundo) e o carrán pequeno (Sterna albifrons) representan o abanico ornitolóxico dunha área de protección inigualable na demarcación mariña da península ibérica.

De entre estes 17 taxóns, unicamente o mourelo común, o palleira rabilonga, a gaivota de Sabine e a gaivota escura non quedan recollidos na Listaxe de Especies Silvestres en Réxime de Protección Especial (LESRPE). Ademais o furabuchos balear, o furabuchos atlántico e o corvo mariño cristado aparecen no Catálogo Español de Especies Ameazadas (CEEA) baixo a categoría de en perigo de extinción (EN) –a primeira- e vulnerable (VU)- as dúas últimas. Neste senso, o furabuchos balear atópase ameazado a nivel mundial segundo os datos da Unión Internacional para a Conservación da Natureza (UICN), sendo cualificada como "en perigo crítico de extinción".

Por outra banda, a ZEPA e a súa área de influencia constitúen unha área crave para a migración do mascato, que é con diferenza a especie máis numerosa, pois se estima que máis da metade da poboación mundial desta especie pasa por estas augas durante a súa migración anual.

13 DE MAIO, UN DÍA PARA REFLEXIONAR SOBRE A IMPORTANCIA DAS AVES MIGRATORIAS E A SÚA PROTECCIÓN

Precisamente este 13 de maio celébrase o Día Mundial das Aves Migratorias, que é unha campaña anual de sensibilización que incide na necesidade de conservar a calquera prezo estas especies e os seus hábitats, resaltando as ameazas ás que se enfrontan durante o seu periplo anual e a súa importancia ecolóxica.

É preciso lembrar que os parques eólicos mariños supoñen un obstáculo insalvable para as aves migratorias, e que as medidas de disuasión/protección que compañías como Capital Energy publicitan nos seus plans offshore non impiden que o impacto sobre a avifauna sexa totalmente inasumible a nivel de conservación, sobre todo tendo en cuenta a elevada superficie de ocupación do parque eólico mariño Breogán, que con 510 MW de potencia instalada e 34 turbinas eólicas de 261 metros de altura en punta de pa alcanzaría segundo proxecto os 84 quilómetros cadrados de extensión ao norte da ZEPA Mariña Punta de Candelaria-Ría de Ortigueira-Estaca de Bares, que linda con outras dúas zonas protexidas a nivel europeo como son a ZEPA Ría de Ortigueira e Ladrido e a ZEPA Costa da Mariña Occidental.

Cartel do Día Mundial das Aves Migratorias 2023 / WMBD

A PROTECCIÓN DAS ÁREAS MIGRATORIAS TRANSFRONTEIRIZAS DAS AVES É TAREFA DE TODOS OS PAÍSES

As aves, que non entenden de fronteiras internacionais durante as súas migracións, requiren dun hábitat en boas condicións para progresar e reproducirse, así como unha rede de sitios adecuados para apoiar as súas viaxes anuais. Por tanto, a cooperación internacional en toda a súa área de distribución migratoria é esencial para a conservación e xestión das súas poboacións e os hábitats dos que dependen, algo que o Goberno de España, sen dúbida, non debería esquecer.

O MITECO DEBE PRIMAR O PRINCIPIO DE PRECAUCIÓN AO INTERESE COMERCIAL DAS GRANDES EMPRESAS ENERXÉTICAS

Tendo todos estes datos en conta, o Ministerio para a Transición Ecolóxica debe primar, ante todo, a conservación, aplicando o Principio de Precaución e non autorizando o parque eólico. É urxente, ademais, que a Administración realice unha modificación dos Plans de Ordenación do Espazo Mariño (POEM) para incluír áreas como a afectada polo proxecto Breogán como o que realmente son: zonas de alto potencial para a conservación da biodiversidade.

PRESENTACIÓN DE ALEGACIÓNS ATA O 1 DE XUÑO

As alegacións públicas xerais preparadas pola Asociación de Defensa Ambiental Salvemos Cabana ao documento ambiental inicial do parque eólico mariño Breogán estarán dispoñibles en ir.gl/alegainibreogan a partir do 27 de maio. O prazo de entrega administrativo finaliza o vindeiro xoves 1 de xuño.

(13.5.2023)